ගෝලීය ත්‍රස්තවාදය දැඩි අභියෝගයක්

දේශපාලන

ගෝලීය ත්‍රස්තවාදය පරාජය කිරීම විශාල අභියෝගයක් බවත්, එය පරාජය කිරීම සඳහා බුද්ධි තොරතුරු හා තාක්‍ෂණය හුවමාරු කරගනිමින් ජාත්‍යන්තර වශයෙන් සියලු රටවල් එකට එක්විය යුතු බවත් අග්‍රාමාත්‍ය රනිල් වික්‍රමසිංහ 07 වැනි දා පාර්ලිමේන්තුවේ දී විශේෂ ප්‍රකාශයක් කරමින් පැවසී ය.

ගෝලීය ත්‍රස්තවාදය පරාජය කිරීම සඳහා පවතින නීති රාමුව ද ශක්තිමත් කළ යුතු බව පෙන්වා දෙන ඔහු ඒ සඳහා ප්‍රතිත්‍රස්ත පනත හඳුන්වාදීමට ක්‍රියා කරමින් සිටින බව ද අවධාරණය කරයි.

වැඩිදුරටත් අදහස් දැක් වූ අගමැතිවරයා –

ගරු කතානායකතුමනි,
පසුගිය දා සිදුවූ අවාසනාවන්ත සිදුවීම පිළිබඳවත් ඉන් අනතුරුව අප විසින් ගත් ක්‍රියාමාර්ග හා ඉදිරි ආරක්‍ෂක වැඩපිළිවෙල පිළිබඳත් මා කිහිපවිටක්ම ජනතාව දැනුවත් කළා. එසේම, බාධා කිරීම් රැසක් මැද අප්‍රේල් 24 දින පාර්ලිමේන්තුවේදීත් මා මේ පිළිබඳ විශේෂ ප්‍රකාශයක් සිදු කළා.

අද දින වනවිට මෙම ප්‍රහාර සම්බන්ධ විමර්ශනවල ප්‍රගතියත්, ප්‍රහාරවලින් ජීවිත හානි වූ හා තුවාල ලැබූ පුද්ගලයින් වෙනුවෙන් වන්දි ගෙවීමේ ප්‍රගතියත්, ජන ජීවිතය යථා තත්වයට පත් කිරීමට රජය විසින් ගෙන ඇති ක්‍රියාමාර්ග පිළිබඳත් පාර්ලිමේන්තුව දැනුවත් කිරීමට මා අදහස් කළා.

මේ වනවිට රටේ ආරක්‍ෂක තත්ත්වය යහපත් තලයකට ගෙන එන්නට ආරක්‍ෂක අංශ සමත් වෙලා තියෙනවා. පාස්කු ඉරිදා ප්‍රහාරයට ඍජුවම සම්බන්ධ දැනට ජීවතුන් අතර සිටින සියලුදෙනාම පාහේ නීතියේ රැහැනට කොටු කරගන්නට සමත් වෙලා තියෙනවා. දැනට ඉතිරි වී තිබෙන්නේ ප්‍රහාරකයින් සමග සමීප සබඳතා පැවැත්වූ පුද්ගලයින් සම්බන්ධව විමර්ශනය කොට ඔවුන් අත්අඩංගුවට ගැනීමයි. තරාතිරම නොබලා ඔවුන්ට එරෙහි ක්‍රියාමාර්ග ගැනීමට
රජයක් විදිහට අපි අවශ්‍ය උපදෙස් ලබා දී තිබෙනවා.

ගරු කතානායකතුමනි,
ත්‍රිවිධ හමුදාපතිවරුන් හා පොලිස්පති විසින් වත්මන් ආරක්ෂක තත්ත්වය පිළිබඳව අද දින මාධ්‍ය දැනුවත් කිරීමට කටයුතු කළා. මීට අමතරව මෙම ප්‍රහාර සම්බන්ධ විමර්ශනවල ප්‍රගතිය සම්බන්ධව මම පොලිස්පතිතුමා වෙතින් වාර්තාවක් ලබා ගත්තා. එය මෙම ගරු සභාවට ඉදිරිපත් කිරීමට කැමතියි.
“ගත වූ පැය 24ක කාලය තුළ දිවයිනේ පැවති ආරක්ෂක තත්ත්වය සම්බන්ධව 2019.05.06 වන දින පෙ.ව. 08.00 සිට 2019.05.07 වන දින පෙ.ව. 08.00 දක්වා ගත වූ කාලය තුළ දිවයින පුරා පැවති ආරක්ෂක තත්ත්වය පහත පරිදි ඔබතුමා වෙත වාර්තා කරමි.
01. මේ වන විට පාසල්වල අධ්‍යාපන කටයුතු ආරම්භ කර ඇති අතර ඊට බාධා ඇතිවන කිසිදු සිදුවීමක් වාර්තා වී නොමැත.
02. සියලුම ආගමික සිද්ධස්ථානවල සුවිශේෂි ආගමික උත්සව නොපැවැත්වෙන නමුත් දෛනික ව සිදුවන ආගමික වතාවත් සාමාන්‍ය පරිදි සිදු වෙමින් පවතී.
03. මගී ප්‍රවාහන ඇතුලු සියලුම ප්‍රවාහන කටයුතු සාමාන්‍ය තත්ත්වයට පත්ව ඇත.
04. දෛනික ව්‍යාපාරික කටයුතු සහ මහජනතාවගේ දෛනික කටයුතු සාමාන්‍ය තත්ත්වයට පත්වී ඇත.
05. දිවයින පුරා වරින්වර පැනවූ පොලිස් ඇදිරි නීතිය මේ වන විට මුළුමනින්ම ඉවත්කර ඇත.
06. විමර්ශන මගින් හා මහජනතාවගෙන් ලැබෙන තොරතුරු මත දිවයිනේ සියලුම පොලිස් වසම්වල අඛණ්ඩව පරීක්ෂා කිරීම සිදු කරමින් සිටී.
07. යොදවා ඇති මාර්ග බාධක හා පවතින ආරක්ෂක තත්ත්වය තවදුරටත් පවත්වාගෙන යාමට කටයුතු කර ඇත.
08. 2019.04.21 වන දින සිදු වු ත්‍රස්ත ප්‍රහාර මාලාවට අදාළව අපරාධ පරීක්ෂණ දෙපාර්තමේන්තුව සහ ත්‍රස්ත විමර්ශන කොට්ඨාශය විසින් පරීක්ෂණ කටයුතු අඛණ්ඩව සිදු කරමින් සිටී.”
ඒ වැඩ බලන පොලිස්පති සී.ඩී. වික්‍රමරත්න මහතා ලබාදුන් වාර්තාවයි.

ගරු කතානායකතුමනි,
මෙම ත්‍රස්තවාදී ක්‍රියාවල පසුබිම පිළිබඳත් මම කරුණු කිහිපයක් සඳහන් කරන්න කැමතියි. 2014 වර්ෂයේ සිටම සිරියාවට ගොස් IS සංවිධානය හා එක්වූ පුද්ගලයින් පිළිබඳ යම් යම් බුද්ධි තොරතුරු ලැබී තිබුණා. IS සංවිධානයේ නායක අබු බකර් අල් බග්දාදි 2014 ජුනි 29 වන දින ඉස්ලාම් රාජ්‍යයක් ප්‍රකාශයට පත් කිරීමෙන් පසුව ලොව පුරා මුස්ලිම් පිරිස් ඉස්ලාම් රාජ්‍යයේ ජීවත්වීමේ අපේක්ෂාවෙන් සිරියාව සහ ඉරාකයට සංක්‍රමණය වෙලා තියෙනවා. ඒ ආකාරයට විදේශීය පිරිස් සිරියාව සහ ඉරාකයට සංක්‍රමණය වූ 2014 වර්ෂයේ අප රටේ පුද්ගලයින් කිහිප දෙනෙකුත් තුර්කිය හරහා සිරියාවට ගමන් කරලා IS සංවිධානයට සම්බන්ධ වී තිබෙනවා. මොහොමඩ් මුහුසින් ඉෂාක් අහමඩ්, මොහොමඩ් උනසින් මොහොමඩ් අමීන් සහ මොහොමඩ් සුවයීර් මොහොමඩ් අරූස් යන ශ්‍රී ලාංකිකයින් විදේශයන් වල සිට සිරියාවට ගොස් IS සංවිධානය හා සම්බන්ධ වෙලා තියෙනවා කියලා වාර්තා වෙලා තියෙනවා.

IS නායකයා විසින් ඉස්ලාම් රාජ්‍යයක් ප්‍රකාශයට පත් කිරීමෙන් පසුව,ඉරාකය හෝ ඇෆ්ගනිස්ථානයේ IS කඳවුරු වෙත ගොස් අවි පුහුණුව ලබා මෙරටට පැමිණි පුද්ගලයින් පිළිබඳ වාර්තා වෙලා නැහැ. එසේ නමුත් මෙරට මුස්ලිම් පුද්ගලයින් සිරියාවට ගිහින් අවි පුහුණුව ලබා පැමිණ ඇති බවට වාර්තා වෙලා තියෙනවා. ඒ පිළිබඳව බුද්ධි අංශ මෙන්ම ත්‍රිවිධ හමුදාව සහ පොලිසිය විසින් විමර්ශන ආරම්භ කර තියෙනවා. අපරාධ විමර්ශන කොට්ඨාෂයේ අත්අඩංගුවේ සිටි මොහොමඩ් ඊබ්‍රාහිම් සාදිත් අබ්දුල් හක් නැමැත්තා 2014 වර්ෂයේ සිරියාවට ගොස් අවි පුහුණව ලබා මෙරටට පැමිණ ඇති බවත්,දෙහිවල බෝම්බය පුපුරුවා ගත් අබ්දුල් ලතීෆ් මොහොමඩ් ජමීල් නමැත්තා IS සංවිධානයට සම්බන්ධ වීම සඳහා 2014 වර්ෂයේ සිරියාවට යෑමේ අරමුණින් තුර්කිය වෙත පිටව ගොස් පෙරලා මෙරටට පැමිණ ඇති බවත් වාර්තා වෙනවා.

IS සංවිධානයට සම්බන්ධව සිට මියගිය මුල්ම ශ්‍රී ලාංකිකයා වන මොහොමඩ් මුහුසින් සෆ්රාස් නිලාම් නැමැත්තා 2015 ජනවාරි 15 වන දින මෙරට සිට තුර්කිය හරහා සිරියාවට යන අවස්ථාවේ ඔහුගේ වයෝවෘද්ධ දෙමාපියන් ද සිරියාවට ගමන් කර තියෙනවා. ඒ වයෝවෘද්ධ දෙමාපියන් දෙදෙනා කාලයක් සිරියාවේ රැඳී සිට 2016 ජනවාරි 29 වන දින මෙරටට පැමිණ ඇති බවත්, ඔවුන්ගේ ක්‍රියාකරකම් හා ඇසුරුකරන්නන් සම්බන්ධයෙන් මේ වනවිට බුද්ධි
අංශ විසින් සමීපව පරීක්ෂණයක් කරමින් සිටන බවත් සඳහන් කරන්න කැමැතියි.

ගරු කතානායකතුමනි,
මෙම ප්‍රහාරවලින් මියගිය හා පූර්ණ ආබාධිත තත්ත්වයට පත්වූ පුද්ගලයින් වෙනුවෙන් රුපියල් මිලියනයක වන්දි මුදලකුත්, තුවාල ලැබූ පුද්ගලයින් සඳහා උපරිමය රුපියල් ලක්ෂ පහ දක්වා වන වන්දි මුදලකුත් ගෙවීමට මෙන්ම හානි වූ දේපළ සඳහා වන්දි මුදල් ගෙවීමටත් කැබිනට් මණ්ඩලය අනුමැතිය ලබා ගත්තා. ඒ අනුව මේ වනවිට කටුවාපිටිය, මඩකලපුව හා කොච්චිකඩේ ප්‍රහාරවලින් මියගිය 102 දෙනා හා තුවාල ලැබූ 42 දෙනා වෙනුවෙන් මූලික වන්දි
මුදල් ගෙවීම මේ වනවිට අවසන් කර තිබෙනවා. එසේම එම ප්‍රහාරවලින් හානියට පත්වූ දේවස්ථාන කඩිනමින් යුද්ධ හමුදාව හා නාවුක හමුදාව එක්ව ප්‍රතිසංස්කරණය කරමින් පවතිනවා. ඒ සඳහා අවශ්‍ය මුදල් ප්‍රතිපාදන අපි ලබා දෙනවා.

ගරු කතානායකතුමනි,
ජන ජීවිතය යථා තත්වයට පත් කිරීමට ගත හැකි සෑම පියවරක්ම ගැනීමට ද අප කටයුතු කරමින් සිටිනවා. ඊයේ දින පාසැල් විවෘත කිරීමට කටයුතු කළා. ආරක්ෂක හමුදා හා පොලීසිය එකාබද්ධව පාසැල්වල ආරක්ෂාව තහවුරු කොට තිබෙනවා. මා මේ සම්බන්ධ වාර්තාවක් අධ්‍යාපන අමාත්‍යතුමාගෙන් ලබා ගත්තා. ඊයේ දින පාසැල් ළමුන්ගේ පැමිණීම අඩු මට්ටමක තිබුණත් එය ක්‍රමයෙන් යහපත් අතට හැරෙනු ඇතැයි අප බලාපොරොත්තු වෙනවා. එසේම, පසුගිය ඉරිදා බොහෝ ක්‍රිස්තියානි පල්ලිවල දේව මෙහෙයන් සිදු කෙරුණා. එසේම පසුගිය සිකුරාදා මුස්ලිම් පල්ලි තුළ යාඥාවන් සිදුකරනු ලැබුවා.
මේ සියලු කටයුතු බාධාවකින් තොරව කරගෙන යාමට අවශ්‍ය ආරක්‍ෂාව සහතික කිරීමට අපේ ආරක්‍ෂක අංශ සමත් වී තිබෙනවා.

නමුත් මම අවස්ථා ගණනාවක දී සඳහන් කළ අන්දමට අනතුර සම්පූර්ණයෙන්ම පහවී ගොස් නැති බව අපි සියලූ දෙනාම මතක තබා ගත යුතුයි. මොකද අද අපිත් ගොදුරු වී ඉන්නේ ගෝලීය ත්‍රස්තවාදයට. ඒ ව්‍යාපාරයට ලංකාවේ සිට සම්බන්ධ වූ සියලු දෙනා අත්අඩංගුවට ගත්තත් වෙනත් ආකාර ගණනාවකින් ඒ ත්‍රස්තවාදය ලංකාවට අත පොවන්නට ඉඩ තිබෙනවා.

ඒ නිසා මේ ගෝලීය ත්‍රස්තවාදය පරාජය කිරීමට ජාත්‍යන්තර වශයෙන් සියළු රටවල් එකට එක්විය යුතුයි. බුද්ධි තොරතුරු හා තාක්‍ෂණය හුවමාරු කරගත යුතුයි. මෙම ත්‍රස්තවාදය පරාජය කිරීම අපිට විශාල අභියෝගයක්. මේ සඳහා පවතින නීති රාමුවත් ශක්තිමත් කළ යුතුයි. ඒ සඳහා ප්‍රතිත්‍රස්ත පනත හඳුන්වා දීමට අපි ක්‍රියා කරමින් සිටිනවා.

එල්ටීටීඊ ත්‍රස්තවාදය පරාජය කිරීමේ දී ලෝකයේ රටවල් ගණනාවක බුද්ධි හා ආරක්‍ෂක අංශ සහය අපට ලැබුණු බව ඔබ සියලු දෙනාම දන්නවා. එසේ නම් ඊටත් වඩා ජාත්‍යන්තර සහයෝගයක් ගෝලීය ත්‍රස්තවාදය පරාජය කිරීම සඳහා ලබා ගත යුතුයි. සමහරුන් ජාත්‍යන්තර සහයෝගය ලබාගැනීම විදේශ හමුදා මෙරටට ගෙන්වාගැනීමට සූදානම් වීමක් ලෙසට හුවා දක්වනවා. නමුත් ඒවැනි දෙයක් සිදුවන්නේ නැහැ. නමුත් සියලු පාර්ශවයන්ගේ සහය ලබා ගෙන අපි ඊට මුහුණ දෙනවා. රටේ ආරක්‍ෂාව තහවුරු කරනවා. ඒ සඳහා අවශ්‍ය නවීන තාක්ෂණය අපි මෙරටට ගෙන එනවා.

ඒ වගේම මේ ත්‍රස්තවාදී හා දේශපාලන අන්තවාදීන්ගේ අරමුණ රටේ එදිනෙදා කටයුතු අඩාල කොට, ජන ජීවිතය කඩා කප්පල් කර, රට තුළ ප්‍රශ්න මවා තමන්ගේ පටු දේශපාලන අරමුණු ඉටුකර ගැනීමයි. රජයක් හැටියට අපි ඒකට ඉඩදෙන්නේ නැහැ. අපි ක්‍රමක්‍රමයෙන් සාමාන්‍ය ජන ජීවිතය අරම්භ කළ යුතුයි. එදිනෙදා වැඩ කටයුතු ක්‍රියාත්මක කළ යුතුයි. හැමවිටම ඉවසිල්ලෙන් හා විමසිල්ලෙන් කටයුතු කළ යුතුයි.

ඒ සඳහා එකට එක් වී අත්වැල් බැඳ ගන්නා ලෙස මෙම පාර්ලිමේන්තුව නියෝජනය කරන ඔබ සැමගෙන් ඉල්ලා සිටිනවා.

RSS
Follow by Email
Facebook
Google+
http://lakdana.lk/2019/05/07/%e0%b6%9c%e0%b7%9d%e0%b6%bd%e0%b7%93%e0%b6%ba-%e0%b6%ad%e0%b7%8a%e2%80%8d%e0%b6%bb%e0%b7%83%e0%b7%8a%e0%b6%ad%e0%b7%80%e0%b7%8f%e0%b6%af%e0%b6%ba-%e0%b6%af%e0%b7%90%e0%b6%a9%e0%b7%92-%e0%b6%85/
Twitter

ප්‍රතිචාරයක් ලබාදෙන්න

ඔබගේ ඊමේල් ලිපිනය ප්‍රසිද්ධ කරන්නේ නැත. අත්‍යාවශ්‍යයය ක්ෂේත්‍ර සලකුණු කොට ඇත *